سندوتش طعمية

كان يا ما كان ولا يحلى الكلام الا بذكر النبي عليه الصلاة والسلام

كان في مرة واحد اسمه مسلم

واقف عند محل الطعمية

3 طعمية يا معلم

ممممممممممممممم ياريت يحط كتير

انا جعان ومحتاج كتير

:(

ليه حط قليل؟؟

يلا مش مهم

مش فاكر اذا كان افتكر يقول بسم الله ولا لاء بس عامةً هو لما كان بينسى كان بيقول في وسط الأكل بسم الله أوله وآخره

مسك سندوتش الطعمية وقال يلا اكله وامري لله

اتضحله حاجة غريبة جدا

ان السندوتش لو كان اتحط فيه اكتر من الكمية اللى فيه كان العيش هيتقطع والسندوتش هيبوظ

واتضحله كمان ان دي الكمية المناسبة جدا لأكله

لانه شبع في نهاية الاكل

وكمان لو كان في كمية أكبر مكانش هيقدر ياكلها وممكن يرميها

فقال في نفسه دي خاطرة

نفس القصة مع الرزق

بنشوف ان مثلا لو واحد بيقبض أقل من 1000 جنيه انهم قليلييييييييييييييييييييين

بس نسينا شئ إسمه البركة

ممكن تاخد ألفين

ولكن الرزق مش فلوس وبس

الرزق بسمة
الرزق سكون في بيتك
الرزق اب وام عايشينلك
الرزق ناس تحبك
الرزق تنام مرتاح
الرزق تمشي مطمن
الرزق تصلي بسكون
الرزق تدعي وتبكي لربك
الرزق انك تمشي في الشارع محدش عارفك ولا حد يوقفك علشان تمضيله
الرزق بتمشي بدون حرس حواليك
الرزق انك بتعيش ومحدش باصص عليك ولا مراقب حركاتك

الناس مبهورة بالشهرة بتاعت الممثلين مع ان الممثلين بيتمنوا حياة الناس
بيتمنوا يمشوا زينا في الشوارع
محدش يعبرهم
محدش يتلم حواليهم

كل ده رزق

هتاخد اكتر من الف

هتتحرم من اكتر من حاجة

هي دي الدنيا

وهي دي خاطرتي

سندوتش طعمية